🏡

Af hverju að vinna hjá Noona?

Laus störf

Öll fyrirtæki þurfa á einhverjum tímapunkti að taka ákvörðun um hverjum það þjónar. Er fyrirtækið til fyrir viðskiptavini þess, starfsmenn, eða eigendur og fjárfesta?

Mantran á opnum mörkuðum er að hlutverk fyrirtækis sé að veita hluthöfum þess góða ávöxtun. Nýtískulegri fyrirtæki hafa ættleitt þann hugsunarhátt að viðskiptavinurinn eigi að vera í forgangi. Að tilgangur félagsins sé að hjálpa viðskiptavinum þess, og að allt annað sé aukaatriði.

Báðum þessum sjónarhornum erum við ósammála.

Að byggja fyrirtæki er leikur. Markmið leiksins er að hjálpa eins mörgum og hægt er með góðri vöru. Peningar eru eldsneyti sem hlúa að því markmiði á sama tíma og þeir mæla hve vel gengur að hjálpa viðskiptavinum. En að hjálpa eða græða er ekki raunverulegur tilgangur leiksins. Tilgangur leiksins, eins og allra leikja, er að leikmennirnir njóti hans.

Leikmennirnir okkar eru starfsmenn félagsins, og því er tilgangur Noona að veita þeim hamingju.

Fyrirtæki er ekkert án þeirra sem um það hugsar á hverjum degi. Það er fólkið sem á endanum ákvarðar hvort fyrirtæki gengur eða ekki. Þegar fólki líður vel, þá stendur það sig vel. Það er einungis þá sem sem við getum sigrað leikinn.

Því er það markmið okkar hjá Noona að gera Noona að besta vinnustað í heimi

Smelltu á örina til að sjá Lausar stöður

Hvað er besti vinnustaður í heimi?

Þegar við tölum um vinnustað, eigum við ekki bara við um skrifstofurnar okkar. Vinnustaður er meira heldur en kaffivélin eða tölvan sem þú notar. Vinnustaðurinn þinn er allt umhverfið sem umlykur vinnuna þína. Fundir, ferlar og vinnan sjálf er hluti af vinnustaðnum þínum.

Hvar besta vinnustað í heimi má finna er huglægt mat hvers og eins. En við höldum að besti vinnustaður í heimi eigi að:

  1. Ýta undir að þú vinnur bestu vinnu lífs þíns svo þú horfir stolt / stoltur til baka á það sem þú áorkaðir.
  2. Veita þér hlutverk, tilgang, heimili og þá tilfinningu að þú tilheyrir.
  3. Vera vettvangur fyrir þig til að vaxa og dafna.

Noona á að spila þetta hlutverk í lífi starfsmanna

Fólkið okkar

Stærsta breytan sem hefur áhrif á vinnustaðinn þinn er fólkið sem þú vinnur með. Okkur mun aldrei takast að hjálpa þér að vaxa ef við umkringjum þig ekki með frábæru fólki. Þú munt einungis sinna þinni bestu vinnu með rétta fólkinu. Tilgang og heimili er ekki hægt að finna án annarra.

Frábært fólk er af öllum stærðum og gerðum. Okkur er alveg sama hvort þú ert strákur eða stelpa, hvort þú sért talari eða hugsari, eða hvort þú kjósir dreyfða vinnu eða vilt borð á skrifstofunni okkar í Skútuvoginum.

En af okkar reynslu eru vissir eiginleikar og ávanar sem einkennir einstaklinga sem geta búið til besta vinnustað í heimi. Þú getur skoðað þá hér fyrir neðan til að máta þá við þig.

📈Jákvæð hallatala vegna forvitni

Þú ert með bratta og jákvæða hallatöluna. Þú verður betri og betri á hverjum degi með því að vera í sífelldri leit að þekkingu og hæfileikum. Þú stenst ekki freistinguna að skoða bækur, myndbönd og annað efni vegna þess hve forvitin/nn þú ert.

Góð merki: Þú lest, tekur námskeið, skrifar daglega og skoðar hugsanir þínar eða gerir annað sem ber þess merki að þú sért náttúrulega forvitin.

☯️ Gott sjálfsálit, lítið egó

Þú horfir á endurgjöf sem gjöf. Sem tækifæri til að vaxa. Þú trúir að þú getur sigrast á erfiðum vandamálum, þó þú sjáir ekki lausnina strax. Þú horfir í augu veikleika þinna, og þú fagnar styrkleikum þínum.

Góð merki: Þú sýnir þrautsegju, hugleiðir, ert með jafnaðargeð, ert í góðum samböndum og átt auðvelt með að samgleðjast.

👁 Hreinskilni og leit að sannleik

Þú ert hreinskilin / hreinskilinn gagnvart þér og öðrum. Þú segir það sem þér finnst og það sem þú heldur að sé rétt, en gerir það þó aldrei til þess eins að sigra samræður. Þú ert að leita að sannleikanum og ert tilbúin að hafa rangt fyrir þér. Þú ert ávallt með æðra markmiðið í huga.

Góð merki: Þú hugleiðir, þorir að tjá þig, og átt í góðum samböndum.

🧗‍♀️ Opinn hugur

Vöxtur krefst breytinga. Án þess að trúa því að hægt sé að breytast, munt þú hringspóla í slæmum ávönum og eiginleikum. Þú ert opin fyrir hugmyndum annarra og ert vökul / vökull fyrir slæmum hugmyndum sem krauma innra með þér.

Góð merki: Hefur breytt skoðun þinni á sjálfum þér (dæmi: Ég var B-manneskja, nú er ég A-manneskja)

🧘‍♂️ Þolinmæði

Þú leitar ekki að styttri leiðum. Þú skilur að árangur tekur tíma og þú flýtir þér ekki. Þú forðast skammtímalausnir sem hægt er að hakka saman. Þú vilt heldur taka þér tíma og byggja traustan grunn. Þú kemur fram við lífið eins og það sé maraþon, ekki sprettur.

Góð merki: Góðir ávanar, þú getur tekið þér tíma í erfitt verkefni, þú drífur þig ekki að bursta í þér tennurnar.

🧭 Vel stilltur móralskur áttaviti

Þú reynir þitt allra besta að gera aldrei það sem er rangt. Hvorki gagnvart sjálfum þér eða öðrum. Þig langar að hafa jákvæð áhrif á fólkið í kringum þig eins og heiminn allan.

Góð merki: Þú gefur öðrum lof. Þú átt auðvelt með að samgleðjast. Þú hendir aldrei rusli á jörðina. Þú hjálpar þegar þú ert beðin/ beðinn um hjálp.

Enginn ber þessa eiginleika á fullkominn máta. En svo lengi sem við hjálpum hvort öðru að rækta þá, höldum við að þessi eiginleika-mixtúra muni skila okkur niður réttan veg í áttina að merkingarfullu lífi.

Ef þetta hljómar eins og vinnustaður sem þú vilt hjálpa okkur að skapa, smelltu hér til að sækja um!

Hvernig vinnum við?

Vöruþróun

Hjarta Noona er varan. Hún slær taktinn í öllu því sem við gerum, og vinna allar stoðir félagsins í kringum vöruna.

Hver dagur hjá tækniteyminu byrjar á daily standup. Á þriðjudögum eru vörufundir þar sem tækniteymið og hönnunarteymið bera nýjungar undir alla aðra í teyminu. Þar er áherslan lögð á opnar og hreinskilnar umræður þar sem allir eru sammála um að markmið okkar er að gera vöruna betri.

Við störfum að sjálfsögðu eftir Agile hugmyndafræðinni. Sprettirnir okkar eru til þriggja vikna og á milli þeirra allra eru skipulagsvikur. Saman mynda þrír sprettir og þrjár skipulagsvikur svokallaðan Epic. Einn epic samsvarar einhverju stóru markmiði sem gerir vöruna og fyrirtækið betur statt til frambúðar.

Fundir

Við höfum almennt litla trú á fundum, og viljum halda þeim í lágmarki. Þó er oft mikilvægt að hittast, stilla saman strengi og tryggja harmoníuna okkar á milli.

Það er einungis einn fundur sem allir á fyrirtækinu mæta á vikulega, og hann er klukkan 16:00 á föstudögum. Þar förum við yfir sigra vikunnar og gefum fólki tækifæri til að gefa hrós þar sem við á, áður en við reynum svo að ljúka fundinum í léttari kantinum.

Annars mætir vörurþróunarteymið á vörufund á hverjum þriðjudegi. Innblástur hans kemur frá bókinni Creative Selection, eftir Ken Kocienda. Í þeirri bók skrifar einn af meðlimum vöruteymisins af fyrsta iPhone-inum um vörufundi sem áttu sér reglulega stað hjá Apple þar sem allir fengu tækifæri til að gagnrýna nýjungar og framfarir sem er verið var að kynna. Þriðjudagsfundirnir eru okkar útgáfa af honum.

Þetta eru einu raunverulegu fundirnir sem eru á dagatalinu okkar í dag. Við erum meira fyrir djúpa og truflunarlausa vinnu og hreint dagatal heldur en mikið af fundum.

Ja, ekki nema í skipulagsvikum (sjá "Vöruþróun"). Þá hittumst við oft og rökræðum mikið.

Vinnutími

Fólk má vinna þegar það vill. Við höfum engar sérstakar væntingar gagnvart vinnutímum fyrir utan það að fólk þarf að vera í vinnunni þegar vissir fundir eiga sér stað - sem eru ekki ýkja margir. Öll vinnum við best á mismunandi máta, og við hvetjum alla til þess að finna sinn eigin takt.

Það eina sem við búumst við er árangur og áreiðanleiki. Að fólk klári verkefnin sín þegar þau eiga að klárast. Ef tíminn er naumur, búumst við við því að fólk leggi hendur á plóginn og geri sitt besta til að ná tímamörkum - innan skynsamlegra marka að sjálfsögðu. Við hrósum fólki ekki fyrir að taka "all-nighter". En á sama tíma, ef þú klárar verkefnið þitt nokkrum dögum fyrir settan dag, hvetjum við þig til að gera það sem þú vilt gera. Ef það er ekkert að gera, þarftu ekki að gera neitt. En ef það er ekkert að gera, þá erum við líklega að gera eitthvað vitlaust.

Utan vinnu

Ef við hittumst utan vinnu elskum við að fara saman í göngutúra. Það er eitthvað við að deila hugsunum í fersku lofti, náttúru og með aðeins hærri púls en venjulega sem gerir það innilegt og ánægjulegt.

Við reynum að skipuleggja 2 innanlandsferðir og 1 utanlandsferð saman á hverju ári. Innanlandsferðirnar geta verið helgarferið í bústað, eða átt sér stað í miðri vinnuviku ef eitthvað sérstakt verkefni er á döfinni sem við viljum lifa og anda innan í stuttan tíma. Utanlandsferðin er svo hámark slökunnar og vináttu. Við gætum gripið í einhverja einfalda og skemmtilega vinnu, en tilgangur hennar væri jafn mikið að njóta og að vinna.

Aðrar síður

Hoppaðu á aðrar síður til að lesa meira

Noona Wiki